BAHASA SUNDA KELAS VI

Maca Talaah

Diajar maham eusi carita jeung manggihan amanat dina carpon.

A. Naon Ari Maca Talaah?

Maca talaah nyaéta maca hiji téks kalayan taliti pikeun maham eusi jeung maksud anu ditepikeun dina éta téks. Dina maca carpon, urang henteu cukup ngan ukur nyaho jalan caritana, tapi ogé kudu bisa maham eusi carita jeung manggihan amanat anu hayang ditepikeun ku pangarang.

Pangarang henteu sagawayah dina nyieun carita. Dina unggal carpon biasana aya eusi jeung makna anu hayang ditepikeun ka pamaca. Ku kituna, nalika maca carpon urang kudu maca kalayan taliti ti mimiti nepi ka ahir sangkan bisa maham eusina kalayan bener.

B. Mikanyaho Eusi Carita

Eusi carita nyaéta hal-hal anu dicaritakeun dina hiji carpon. Pikeun mikanyaho eusi carita, urang kudu merhatikeun saha palakuna, naon anu kajadian, jeung kumaha kajadian anu dicaritakeun.

Sanggeus maca carpon, urang bisa nyaritakeun deui eusi caritana ngagunakeun kalimah sorangan. Teu kudu nyaritakeun sakabéh carita, cukup nyaritakeun bagian-bagian pentingna. Ku cara kitu, urang bakal leuwih gampang maham maksud carita.

Conto:

Dina carpon Ucing Liar, dicaritakeun Ardi anu resep miara jeung nulungan ucing liar. Kabiasaan hadé Ardi ahirna dipikanyaho ku Dinas Peternakan dan Kesehatan Hewan nepi ka manéhna meunang bantuan.

C. Mikanyaho Amanat

Dina carpon aya pesen anu hayang ditepikeun ku pangarang ka pamaca. Éta pesen disebut amanat.

Amanat

Amanat nyaéta makna atawa pesen anu hayang ditepikeun ku pangarang ngaliwatan carita.

Amanat ditujukeun sangkan pamaca meunang pangajaran sarta bisa jadi jalma anu leuwih hadé, boh dina pamahaman boh dina laku lampah.

Amanat bisa mangrupa informasi, naséhat, atawa pangajaran ngeunaan hiji hal. Ku kituna, sanggeus maca carpon urang kudu mikirkeun kahadéan naon anu bisa diconto jeung kalakuan naon anu henteu meunang diturutan tina éta carita.

D. Cara Nangtukeun Amanat Carpon

Maca carpon nepi ka bérés.
Ulah maca sabagian waé sangkan henteu salah maham caritana.

Maham eusi carita.
Titénan naon anu dicaritakeun ti mimiti nepi ka ahir.

Niténan kalakuan palaku.
Perhatikeun kalakuan anu hadé jeung anu goréng dina carita.

Manggihan pangajaran tina carita.
Pikirkeun hal hadé naon anu bisa diconto ku urang dina kahirupan sapopoé.

Nangtukeun amanat.
Tuliskeun pesen atawa pangajaran anu hayang ditepikeun ku pangarang.

E. Conto Nalaah Carpon

Judul Carpon: Ucing Liar

Pangarang: Fajar Purnama Sidik

Eusi Carita: Nyaritakeun Ardi nu resep ngingu ucing liar nepikeun ka meunang bantuan ti Dinas Peternakan dan Kesehatan Hewan.

Amanat: Salaku manusa, urang kudu mikanyaah mahluk hirup ciptaan Alloh.

Tina carita éta, urang bisa maham yén kalakuan Ardi anu mikanyaah jeung nulungan ucing liar mangrupa kalakuan anu hadé. Éta kalakuan bisa dijadikeun conto dina kahirupan sapopoé.

Urang ogé kudu mikanyaah mahluk hirup ciptaan Alloh, kaasup sasatoan anu teu diingu jeung keur kalaparan.

Kacindekan

Maca talaah lain ngan saukur maca carita, tapi maca kalayan taliti sangkan urang maham eusi carita jeung manggihan amanatna. Sangkan bisa manggihan amanat kalayan bener, urang kudu maca carpon nepi ka bérés, maham eusina, niténan kalakuan palakuna, tuluy manggihan pangajaran anu aya dina éta carita.

GURU RAHARJA

MACA TALAAH - BAHASA SUNDA KELAS VI